மருத்துவர் அலட்சியம் ...இளம் வீரன் மரணம்..

அவன் பெயர் தனஞ்சய் ராய். 22 வயது. அஸ்ஸாம் மாநிலத்தில் இருந்து எல்லை பாதுகாப்பு படையில் பணி புரிய  தகுதி பெற்று நான் பணிபுரியும்  ராஜஸ்தானின் ஜோத்பூரில் உள்ள எல்லை பாதுகாப்பு படை பயிற்சி பள்ளியில் கடந்த மூன்று மாதமாக பயிற்சி பெற்று வந்தான்.எனது கம்பெனியில் எனது அணியில்  இருந்த அவனது NO 104.பயிற்சியில் பெயர் சொல்லி அழைப்பது கிடையாது.

FIRING RANGE

துப்பாக்கி  சுடும் பயிற்சி பகல் இரவு பயிற்சியாக  கடந்த 2ம் தேதி முதல் ஆரம்பிக்க..ராஜஸ்தானின் கோரமான வெயில் தனது உச்ச பட்ச உக்கிரத்தை காட்ட ஆரம்பித்தது.3ம் தேதி இரவு 1130 மணி அளவில் தனது அறையில்  வாந்தியும் காய்ச்சலுமாக HEAT STROKEகினால்  வாட ஆரம்பித்த அவன் REFERENCE HOSPITAL என்று கிண்டலும் வேதனையுமாக அழைக்கப்படும்   எ  பா படை மருத்துவமனைக்கு அவசரமாக எடுத்து செல்லப்பட அங்கிருந்த  செவிலியால் அழைக்கப்பட்ட எ பா படை மருத்துவர் அவனை மாவட்ட அரசு மருத்துவமனைக்கு(மகாத்மா காந்தி மருத்துவமனை. ஜோத்பூர்) அனுப்பி வைத்தபோது இரவு மணி 1.30 மணிக்கு மேலாகியது.எனக்கு தகவல் கிடைத்து 2.30 மணிக்கு நான் சென்ற போது எமர்ஜென்சி பிரிவில் அவனது வாயில் இரண்டு குழாய்கள் பொருத்தபட்டிருந்தன.ஆக்சிஜன் கொடுக்க பட்டிருக்கும் போல..இன்னொரு குழாய் வழியாக ரத்தமா ஏதோ ஒன்று வெளி வந்து கொண்டிருந்தது.தன்னை அறியாமல் கழியும் மலம் தொடர்ந்து கொண்டிருக்க மருத்துவர்கள்  நிலைமை மிக கவலைக்கிடமானது என்று சொல்லி சென்றார்கள்.

DHANANJAI ROY 

மோசமான நிலையிலும்3.00 மணிக்கு மேல் வார்டுக்கு அவன் மாற்றபட்டான்.அங்கு பணியில் இருந்த மருத்துவர் அநேகமாக பயிற்சி மருத்துவராக இருக்க வேண்டும்.அவரும் நிலைமை கவலைக்கிடம் என்றாலும் தொடந்து கண்காணித்து கொண்டார்.தொடர்ந்து  தூக்கி வாரி போடும் அவனது உடல் எனக்கு பயத்தை தந்தது.வாயில் உள்ள  குழாயினை மீறி வெளிவரும் ரத்த வண்ண நுரை தெறித்து வர வர சில நேரம் உடலை முறுக்கி கொண்டு திமிரும் அவனை கட்டுப்படுத்த முடிந்த அளவு உயிரை கட்டுப்படுத்த முடியவில்லை.பயிற்சி மருத்துவரால் அழைக்கபட்ட மூத்த மருத்துவர் கடைசி வரை வராமலேயே இருந்து விட காலை 9.25க்கு தன்  22 வயதோடு மூச்சை நிறுத்தி கொண்டான் தனஞ்சய்.

என் கைகளுக்குள் கண்ணுக்குள் நிலை குத்தி நின்ற அவன் கண்கள் கேட்கும் கேள்விகள் என்னை தூங்க விடுவதில்லை .எங்கே சார் பெரிய டாக்டர்?ஏன் என்னை ICU கொண்டு செல்லவில்லை?அந்த டாக்டரும் என்னை போல் உடல் நலம் இல்லாமல் இருந்தாரோ?இருக்காரா செத்து விட்டாரா?என்னை நீங்கள் தனியார் மருத்துவமனைக்கு எடுத்து சென்றிருந்தால் பிழைத்திருப்பேனோ?பயிற்சியில் நான் செய்யும் தவறுக்கு தண்டனை கொடுக்கும் நீங்கள் வேலைக்கே வராத அந்த மருத்துவருக்கு என்ன தண்டனை தருவிர்கள்?உங்கள் தம்பி இறந்திருந்தால் பாடி யை வாங்கியிருப்பிர்களா?உலகத்தின் இரண்டாம் பெரிய துணை ராணுவத்தின் வீரனுக்கு இந்த கதி என்றால் கஷ்டப்படும் சாதாரண மக்களுக்கு என்ன மருத்துவம் கிடைக்கும்?இந்த அரசு ஆர்மிக்காக சகல வசதிகள் கொண்ட மருத்துவமனை கொடுத்து இருந்தாலும் என்னை போல் உள்ள எல்லை பாதுகாப்பு படை வீரர்களுக்கு அங்கு மருத்துவம் தர மறுப்பது ஏன்?எந்த கேள்விகளுக்கும் விடை இல்லை..விடைகள் இருந்தாலும் நேர்மையாக இருக்க வாய்ப்பில்லை.

முதல் மாத சம்பளம் இட பட்டு அதை எடுக்கவோ பார்க்கவோ பெருமிதப்படவோ முடியாமல் போய்விட்டான் அவன்.முதல் சம்பளத்தில் அவன் அம்மாவுக்கு என்ன வாங்கி அனுப்புவதாய் சொல்லியிருந்தானோ?தன் காதலிக்கு என்ன என்ன சொல்லியிருந்தானோ?வரும் வாரம் நடக்கவிருக்கும் முதல்  இடைதேர்வுக்கு கஞ்சி இட்டு தயாராக உள்ள அவன் சீருடை எதுவும் அறியாமல் காத்து கிடக்கிறது.

பொது சனத்தில் ஒருவன் உணர்ச்சி வசப்பட்டு மருத்துவரை தாக்கியவுடன் 'ருத்ர' தாண்டவமாடும்  மருத்துவ மாமனிதர்கள் தனது பணிக்கு கூட வராமல் வீட்டிலும்,வெளியேயும் ஆணீ புடுங்கும் மருத்துவர்களை கண்டிக்க,பேச மறுப்பது  மறுப்பது ஏன்?

அங்கு வந்த ஊடகம் CHANNEL24ன் நிருபரிடம் சொன்னபோது, தட்டி கேட்கவே ஊடகம்... நீங்க தைரியமா சொல்லுங்க என்ற போது மருத்துவர் அலட்சியத்தை பற்றி நான் சொன்னேன்.இறந்த தனஞ்சய் உடலின் புகைப்படம் கேட்டபோது அதையும் தருவதாக சொன்னேன்.இரண்டு நாளாகி எந்த செய்தியும் எந்த ஊடகத்திலும் வராமால் இன்று நேரிடையாக ஊடகத்து அலுவலகத்தில் புகைப்படம் கொடுத்த போது புகைப்படம் போதாது காணொளி வேண்டும்  என்றனர்.அது தவிர எ பா படையில் இருந்து இது குறித்து அரசு மருத்துவமனைக்கு விசாரணை கோரி கடிதம் வரும் பட்சம் நாங்கள் அந்த கடிதத்தை மூலமாக வைத்து அனைவரிடமும் பேட்டி..விசாரணை செய்து செய்தி தருவோம் என்றனர்.ஊடகம் எனது மூத்த அதிகாரிகள் என்னிடம்.. ஊடகம் மிக கவனமான ஒன்று..உன்னிடம் செய்தி வாங்கி சம்பந்தப்பட்டவர்களை சந்தித்து பேசி பரஸ்பர புரிதலில்,மிரட்டலில் காரியம் சாதிப்பார்கள் என்ற போது எனக்கு நம்பிக்கை வரவில்லை.ஆனால் மேல் கண்ட இரு புகைப்படத்தை கூட வாங்காமல் எ பா படையின் நடவடிக்கை பொறுத்தே எங்கள் செய்தி வெளியாகும் என்பது ஊடகத்தையும் சந்தேகிக்க தூண்டுகிறது.


அரசு மருத்துவர்களின் அலட்சியத்தினால் மட்டுமே இந்த உயிரிழப்பு என்பதில் எவ்வித சந்தேகமும் இல்லை.கைப்பையில் இருந்து விழும் ஒரு வேண்டாத காகிதத்தை போல ஒரு மிக சாதாரணமாக ஒரு உயிரை,இளமையை,வீரனை,தொலைத்தது மிக கொடுமையான ஒன்று..

சரியான முறையான சிகிச்சை அளித்தும் பலனளிக்காமல் இறக்கும் பட்சம் மனசுக்கு இவ்வளவு வேதனை இருந்திருக்காது.இன்றும் நேற்றும் அவனது மதிப்பெண் பட்டியலில் ----- குறி இடும்போது கண்களில் நீர் கட்டுகிறது.

	Tweet